Wall - E, A Must Watch Movie

வணக்கம்...

போன முறை நான் 'சத்யம்' படம் பார்த்து நொந்த கதை நீங்கள் அறிந்ததே..

நேற்று விநாயக சதுர்த்தியை முன்னிட்டு, விடுமுறை 

என்பதால் கொஞ்சம் ஆற, அமர உட்கார்ந்து, போன வாரம் வியாழக்கிழமை, 

என் அன்பு நண்பர்கள் ரவி, அபி, கே.பி, விஜி, ரமேஷ், பிரபு,முரளி ஆகியோருடன், 

inox ல் வால் - இ (WALL-E) படம் பார்த்த நினைவுகளை 

சற்றே அசை போட்டு மகிழ்த்தேன்....

நண்பர்கள் அனைவருடனும் படம் பார்ப்பதே 

ஒரு சுகானுபவம்..

அதிலும், இந்த நட்பு வட்டம் 

எனக்கு ரொம்ப ரொம்ப ஸ்பெஷல்....

திடீரென்று எவ்வித முன்னறிவிப்பின்றி 

படம் பார்க்க போவதே எங்கள் வழக்கம்..

அன்றும் அது போலவேதான்... 

திடீர் திட்டம்.. உடனே படம்...

சரி.. இனி படத்தைக் கொஞ்சம் அலசுவோம்..

பிக்ஸர் (Pixar)  அன்பர்கள், 

சுமார் 180 மில்லியன் டாலர் செலவில், 

( இதுதான் அவர்கள் தயாரிப்பிலே 

மிக அதிக செலவில் எடுக்கப்பட்ட படம்) 

எடுத்துள்ள படம்தான் வால் - இ..

கதை, வேறென்ன காதல்தான்... 

ஒரு சின்ன வித்யாசம்.. இதில் காதலர்கள் இரண்டு ரோபோக்கள்..
மனிதர் உணர்ந்து கொள்ள இது மனிதக்காதல் அல்ல.. 

அதையும் தாண்டி இயந்திரக்காதல்..

வருடம்: கி.பி. 2815:

 நாம் வாழும் இந்த உலகம் மனித வாழ முடியாத அளவுக்கு

 இயந்திரக் குப்பைகளும், மற்ற ப்ளாஸ்டிக், இன்ன பிற குப்பைகளும் நிறைந்த ஒரு இடமாக மாறி இருக்க, ஏழ்நூறு வருடங்களாக மனிதர்கள் விண்வெளியில்

 ஒரு மாபெரும் விண்வெளிக் கப்பலில்,

பல்வேறு வகையான ரோபோக்கள்

 உதவியுடன் வாழ்கிறார்கள்..

இங்கே உலகில், நம் கதையின் நாயகன்

 வால் - இ குப்பைகளை சதுர வடிவ செங்கல் போலே திரட்டி அடுக்கி 

வைத்துக் காலம் கழிகின்றார், சாரி.. கடமையைச் செய்கின்றார்.. பல்லாண்டுகால உலக வாழ்வில், 

பல உணர்வுரீதியான விஷயங்களை  புரிந்து கொள்ளும் வால் - இ,

 பொம்மைகளையும், மற்றும் பல பொருட்களையும் சேர்த்து வைக்கிறது..  தனக்கென்று ஒரு நண்பனையும் தேடிக்கொண்டு, 

தினமும், 1969 ல் வந்த,  "Hello dolly" படத்தில் வரும் 

  "Put on Your Sunday Clothes" and

 "It Only Takes a Moment" பாடல்களை பார்த்து,

உணர்வுகளை வளர்த்துக்கொள்கிறது...  

 வால் - இ யின் நண்பர் யாரென்று சொல்ல மறந்துவிட்டேன்..

  ஒரு கரப்பான்பூச்சி... 

ஒரு நாள், புதிதாக வருகிறது ஒரு பெண் ரோபோ, பெயர்   "ஈவா"  அழிந்த உலகில் ஏதாவது உயிர்கள் உள்ளதா

 என்று பார்ப்பதற்காக மனிதர் வாழும் கப்பலில் 

இருந்து வருகின்றது.

ஈவாவைக் கண்டதும் காதல் கொள்கிறது வால் - இ.

வால் - இ, ஈவா உடன் நட்பை ஏற்படுத்திக்கொள்ளும்

 காட்சிகள் மற்றும்,

 தன்னுடைய அன்பை புரிய வைக்க படும் பாட்டை 

வெள்ளிதிரையில் காண்க..

எவ்வித உரையாடலும் இல்லாத முதல் 40 நிமிடங்கள்.. 

விவரிக்க வார்த்தை இல்லை.. பாருங்களேன்..
ரசிப்பீர்கள்.. ஒரு மௌன புன்னகையுடன்...

ரோபோ க்கள் பேசும் காதல் மொழி, 

அவற்றின் பெயர் தான்...
வால் - இ... ஈவா.. என்று இரண்டும் ஒன்றை ஒன்று 

வாஞ்சையுடன் அழைத்துகொள்வது 

இனிய கவிதை..

பெயர்களை அழைக்கும் விதத்தை வைத்தே

 அந்த காட்சிக்கான உணர்வுகளை

 நம்மால் புரிந்து கொள்ள முடிவது...   

அற்புதமான யுக்தி...

தன் கப்பலில் தன்னைத் தேடி வந்து நிற்கும் 

வால் - இயை பார்த்து, ஆச்சரியம், பரிதவிப்பு, மகிழ்ச்சி, பயம் என்று கலவையான அத்தனை உணர்வுகளையும்... 

 "வால் - இ... " 

என்று அழைக்கும் ஒற்றை சொல்லில் காட்டுகிறது ஈவா.. 

முக்கியமாய், ஈவா..  வெட்கப் படுவது..

ஏ யப்பா.. கண்கொள்ளாக்காட்சி...

இன்னும் விளக்கமாய், காட்சிகளைக் கூட விவரித்து எழுத ஆசைதான்..

ஆனால், நீங்களே படம் பார்ப்பது, 

பார்த்து, கேட்டு, கண்டு ரசித்துக் களிப்பது.. 

இன்னும் சுவையான அனுபவமாய் இருக்கும்...

இது நிச்சயமாய், பார்க்க வேண்டிய ஒரு படம்... 

தயவு செய்து பாருங்கள்...

படத்தின் மிக சிறந்த காட்சிகள்:

1. வால் - இ கண்டெடுக்கும் மோதிரப் பெட்டியில் மோதிரம் இருக்க, 

அதை விட்டு விட்டு, பெட்டியை பத்திரப் படுத்துவது...

2. வால் - இ மெல்ல மெல்ல ஈவா அருகில் நகர்ந்து உட்கார்வது.. 

3. மிகுந்த போராட்டத்திற்கு பின்னே வால் - இ, ஈவாவை காணும் போது, நெகிழ்ச்சியான குரலில் காதலுடன் "ஈவா..  " என்று அழைப்பது...

4. தன் கால் சக்கிரத்தில் நசுங்கி கரப்பான்பூச்சி இறந்து விட்டதோ என்று  வால் - இ பதறுவது..

5. வால் - இ விண்கலத்தில் மாட்டிக் கொண்டு போராடும் கணத்தில், 

ஈவா பாய்ந்து பறந்து, காப்பாற்ற ஓடுவது, சாரி, பறப்பது...

6. கொட்டும் மழையில் ஈவா நனைந்து விடாமல் வால் - இ 

குடை பிடித்தபடி காத்திருப்பது

7. விண்வெளியில் வால் - இ,  ஈவா ஆடும் நடனம்..

8.  ஈவாவின் கரம் கோர்க்க வால் - இ முயற்சிக்கும் தருணங்கள்...

9. வால் - இயை பார்த்து ஈவா வெட்கப்படும் காட்சி..

10. தான் அழிந்தாலும் பரவாயில்லை, செடியைக் காப்பாற்றி

 ஈவாவின் கடமை நிறைவேற வேண்டும் 

என்று  போராடும் வால் - இ

இப்படி பல பல காட்சிகள்.. எதைச் சொல்ல எதை விட 

என்று தடுமாறிப் போகிறேன்...

படத்தின் முடிவில், நம்மையும் அறியாமல், 

நம் கடைவிழியோரம் இரு சொட்டு கண்ணீர் வழியுமே..

அதுதான் காதலின்  வெற்றி...

நிச்சயம் பார்க்க வேண்டிய அருமையான படம்: Wall-E

பி.கு: போகிற போக்கைப் பார்த்தால்.. பின்னாளில், 

 காதல் மறைந்து போய்விடுமோ என்று
நான் நம் பிற்கால சந்தியினரை எண்ணி பயந்ததுண்டு.. 

ஆனால், காதல் என்றும் அழியாது, அது, நமக்கு நம்மை மீண்டும் ஏதோ ஒரு வழியில்

 அடையாளம் காட்டும் என்று இன்று நம்பிக்கை வந்து விட்டது.
இயந்திர ரோபோக்கள் பின்னாளில் காதல் வயப்படும் என்றால், நிச்சயம், மனிதரும் காதலை மறக்க மாட்டார்கள்

 என்றே நம்பிக்கைக் கொள்வோமாக...